الفيلم كما شاهدتة
ادم اخطأ وأكل من الشجرة المحرمة.. ومش راجع الجنة تاني
عقاب ادم كان نزولة الارض.. الي بيحكمها الشيطان
الدنيا صالة قمار .. متتعبش نفسك
لايوجد اي مشهد لرجل دين او شيخ جامع.. او حتى راجل لابس ابيض في ابيض
استغفر الله العظيم) اتقالت مرة واحدة بس طول الفيلم.. لدرجة اننا ضحكنا
الدنيا مفيهاش كرامة.. فا متتحمأش اوي يعني
الدنيا فيها حب و فيها جنس ..خد الاتنين و ريح نفسك
الكازينو زي الكفن تدخل فيه عريان وتخرج منه عريان».. ومن غير قطنة كمان
الشيطان بيغير من الخالق و عاوز يقلدة بأصطفاء ابن او خليفة
اعمل الي انت عاوزة في الاخر انت بتعمل الي الشيطان عاوزة
........................
انا فين
الرياض .. دبي .. الاسكندرية
و بالعكس
هناك ٢٣ تعليقًا:
فيلم فلسفي جامد جدا
وللأسف الشديد جدا عدد كبير من الشباب الصغير في السينما لم يعجبه الفيلم
حاجة تحزنك على مستقبل الاجيال اللي جايه
تحياتي
فيلم مقرف وقذر وزباله ومفيهوش اى حاجه ليها قيمه شويه ستات قذره وخلاص
خالد صالح رغم حبى ليه الا انى محبتش دوره اللى اتقنه لانى حسيت انو بكل صراحه وبجاحه عامل فيها استغفر الله اله وكل كلامه لو ركزنا بيقول كدا
دا اللى حسيته وخرجت مقروفه من الفيلم دا بصراحه
a.samir
اسمحلى اختلف معاك وياريت ياريت تبينلى فين الفلسفه اللى عاجباك فالفيلم ومخوفاك على الجيل والشباب الصغير اللى مش بيفهم
الفيلم مثله ككل الافلام التي بني فيها السيناريو و الحوار علي خلفية اسقاطات دينية
كل من قرأ العهدين القديم و الجديد استطاع ان يميز كم الاقتباس في الاخراج و التأليف منهما
و ليس الامر غريبا اذا عرفنا ان كاتب الفيلم هو هاني فوزي
الفيلم ما عجبنيش انا كمان لأنه بيقدم افكار كثيرة سيئة وشئنا او ابينا السينما فن يشكل وعي الشعوب و من ناحية اخري الفيلم مبذول فيه جهد كبير سواء في التمثيل او الاخراج او الكتابة
على فكرة يا كراكيب الفيلم لا مبذول فيه مجهود على صعيد السيناريو ولا الإخراج ولا التمثيل ولا أي حاجة ، هاني سلامة بنفس التعبيرات الساذجة من ساعة ما طلع مع شاهين من عشر سنين .. خالد صالح بنفس الأسلوب طول أحداث الفيلم ونفس الشكل اللي اعتاد تقديمه من وقت نجاحه في تيتو سنة 2004 ويضيف بقى المرة دي التبريقة الهابلة اللي انتهت من الخمسينات واللي مش عارف مين الحمار اللي قاله يعملها .. غادة وسمية مش هعلق بصراحة !!
من ناحية السيناريو .. أسوأ سيناريو لهاني فوزي اللي هو مبدع حقيقي في نظري - يكفيه بحب السيما - بس فعلاً معرفش إيه اللي هو كاتبه ده !! ، سرقة التيمة الأساسية بشكل واضح - والمزعج إنه مفكك ومفبرك - من فيلم محامي الشيطان 1997 مع بعض الاقتباسات من العهدين زي ما انتَ قلت وشكراً على كده ، شخصيات لا عارفة جاية منين ولا رايحة فين .. وأحداث مفيهاش أي منطق ولا تتابع .. وتوهان واضح جداً بين إنه بيقدم فيلم رمزي العلاقة التجاذبية الشهيرة بين الشيطان والبني آدم .. وبين إنه بيقدم فيلم عن كازينو قمار فطلعت النتيجة متخبطة درامياً إلى أقصى حد
من ناحية إخراجية يلعن أبو خالد يوسف وكان نفسي أقول على أبو اللي دخله المجال بس هتخبط فيَّ في الآخر عشان دي غلطة شاهين اللي مش هسامحه عليها أبداً ، نص كادرات الفيلم مسروقة من فيلم كازينو بتاع مارتن سكورسيزي .. مونتاج مفكك وإيقاع واقع تماماً مخلي الفيلم طويل وممل بشكل لا يحتمل ، استخدام من أسوأ ما يكون للخدع البصرية - شفتوا لما عين خالد صالح برقت وظهرت اللمعة الجنان دي ؟ -
مع حشر مستمر لمشاهد الجنس كي يتم ترويج الفيلم تجارياً في تخطي حتى لأسلوب إيناس الدغيدي في هذا الجانب
بالمناسبة أنا معنديش مشكلة إن الشخصيات تقول كلام لا نتفق معاه لو كان ده منطق الشخصية ، المفروض إن ده الشيطان ومش مطلوب منه يقول مواعظ دينية أبداً ، ومش مطلوب من الفيلم كمان إنه يجيب شخصية رجل دين ويحشرها أو يجيب راجل أبيض وأبيض ولا إن الشخصيات تردد استغفر الله العظيم باستمرار لإن أغلب الأحداث بتدور في صالة قمار ، يا ريتها بس جات على قد كده يا إسكندراني :) ، المشكلة في الفبركة والاستهبال والإدعاء الشديد اللي بيحصل ..
فيلم عظيم جداً زي أرض الخوف بتاع داوود عبد السيد ناقش نفس الفكرة بتاعة الإنسان الخارج من الجنة والموجود على الأرض بكل اللي بيحصل فيها ، بس فرق السما من العمى ما بين ده وده ، ما بين مبدع حقيقي وبين مجرد مدعي ساذج لا يفقه شيء عن السينما إلا الجعجعة والطنطنة المستمرة في سبع أفلام متتالية
فيلم من أسوأ ما يمكن وبدون مبالغة مفيهوش شيء كويس .. حتى خالد صالح .. حتى سيناريو هاني فوزي .. حتى موسيقى راجح داوود ، في الواقع خالد يوسف عنده قدرة مشفتهاش في مخرج قبل كده على إنه يصنع في كل مرة أسوأ مما كان من قبل ، متصورتش إن بعد هي فوضى وحين ميسرة أشوفله فيلم أسوأ من كده .. بس عشان هو مبدع مجدد في إنتاجه كان عنده القدرة على ده
ومن اين يأتى التقدم
.......
لنا الله
خالص تحياتى
أنظر تعليق كراكيـــــــــب karakib
اسقاطات ديني واضحة
مشفتش الفيلم ولكن شفت كباريه وحصلي القرف
كنت ها انزل بوست عنه وتراجعت استخسارا
تصدق اللي منعني هو الحاجز النفسي بيني وبين خالد يوسف
والمبني اساسا من ايام سلفه شاهين
:))
ولكن ما تعرفش زهق الصيف ممكن يخلي الواحد يدخله
:))
عموما المرور لاقاء التحيه
بصراحة انا جيت اسلم بس
يا تري فاكرني
مش حعلق علي الفيلم اولا عشان مشفتهوش
ثانيا لما بعلق علي خالديوسف بيقولوا عليه متخلفه
اولا أسف جداا للتأخير لظروف العمل و البرد الصيفي
A.SAMIR
معاك في ان الفيلم لية فلسقتة الخاصة الي فشل بالتأكيد في توصيلها للمتفرج
بس مش معاك في ان الشباب الصغير لسة موصلش للنضج الفلسفي
بالعكس انا شفت الشباب وهو مستمتع جدا باللقطات الجنسية الكتيرة
مش دي فلسفة بردوا ولا اية؟؟
:)
تحياتي ومنوري في اول زيارة
سمر الشافعى
ههههههههههههه
حرام عليكي انت كدة بتعملي دعاية للفيلم اكتر من روتانا سينما
يمكن لو كنتي اتفرجتي علية و انت بتكلي ناتشوز زيي . كان يمكن يعجبك
:)
تحياتي يا توتا سابقا
karakib
بص يا هاني كنت موافقك على كل كل كلامك لحد ما وصلت لنقطة مبذول فية جهد في التمثيل
دا حتى خالد صالح الي ممكن اعتبرة الوحيد الي مثل في الفيلم في ناس معترضة علية
بس الاكيد ان الفيلم نجح في ان يزيد عدد كارهي خالد يوسف
تحياتي
محمد المصري
انا كنت فاكر تعليقك موجهة لكراكيب لحد ما لقيت اسمي في جزء منة
علشان كدة حرد على الجزء دة بس
اللعبة الابدية الي نعرفها هي بين الخير و الشر
فيوم مايتعمل فيلم يتوج فية الشر منتصر لازم يكون فية مشهد او اتنين للخير و هو بيخسر
بس المعركة تكون بين واحد بيغش في اللعب و بينام كل يوم مع وحدةو بين الشيطان من الناحية التانية
يبقا كدة ...
المهم
تحياتي لي تحليلك الجامد لشريط منير الاخير
نبض اسكندرية
في كل الحالات التقدم مش حيجي لوحدة
لا بي فيلم ولا حتي مسلسل 200 حلقة
تحياتي
شـــــهــــروزة
انظري الرد على كراكيب
وبردوا نورتي عالم التدوين
تحياتي
بنت القمر
لو زهق الصيف خلاكي تدخلي فيلم كبارية
فا زهق الخليج يخليني ادخل زكيا زكريا لو نزل في السينما تاني
:)
خالد يوسف بيعمل الطبخة الي مبتخيبش
فكرة غريبة و جنس وممثلين معروفين و جنس و معاجة غير مفهومة و عليهم شوية لقطات جنس وساعتين في الفرن
وبالهنا و الشفا
تحياتي و منوراني حتي في المرور السريع
نهر الحب
اولا الله يسلمك
و اكيد فاكرك
اي حد بيعلق في المدونة دي بيبقا صديق مبيتنساش حتي لو غااااااااب
علقي زي مني عاوزة
بجد محدش بقا فاهم حاجة
وتهمة التخلف جاهزة لي اي حد حتي لو كان الي حيعلق احمد زويل
تحياتي بعد الغياب
:)
يا رب تستمتع بوقتك في اسكدندرية
:)
ازيك يابلدياتى . سعيده جدا بتدويناتك
فى الحقيقه لم ارى الفيلم
افلام خالد يوسف بيكون لها هدف وهو فنان الا ان بيكون فيها مناظر مش لطيفه لا تستطيع ان تراهااسره بدون حرج فى رأيى توصيل المضمون بدون هذه المناظر الفجه انا دخلت
حين ميسره الفيلم مؤثر وبيبين اثر الفقر والحهل والزحمه فى ازدياد الانحراف لكن مايحدث فى حجر النوم ممكن الاشاره اليه دون تمثيله. ربنا يحفظك ويحميك
سلااااااااااااام
rosa
ميرسي يا روزا ومبروووووك
:)
تحياتي
klmat
لو اشاروا للمشاهد الجنسية من غير توضيح
محدش حيخش الفيلم اصلا
المهم
منوراني وتحياتي
بالرغم اني مشفتش الفلم
ولا هشوفه علام اعتقد
بس عارف ايه اللي عجبني
؟؟؟؟؟؟؟؟؟؟؟؟؟؟؟؟؟
تلخيصك للفلم باسلوب حلو ومختصر ومعبر جدا وبنظره شدتني اووووووي
إرسال تعليق