السبت، ٢٥ أكتوبر ٢٠٠٨

ضربة البداية

سيبك من إنه الأهلي صاحب الحق الحصري أوالحق الحضري، ودعك من أن اتحاد الكرة هو صاحب ملكية لعبة كرة القدم، ولا تهتم خالص بأن اتحاد الإذاعة والتليفزيون متواطئ أو متورط أو متوارم مع الأهلي، ولا يهمني ببصلة أن تذاع مباريات الأهلي علي قناته أو علي قناة السويس أو أن جمهور مصر يتم حرمانه من مشاهدة فريقه الغالي، فالحقيقة أنه لن يحرم ولا حاجة، ثم إن جمهور مصر محروم من شربة المياه النظيفة ومن اللقمة الحلال ومجتش علي الماتش، ولا يهمني أن الناس لم تشاهد الاستديو التحليلي لمباراة الأهلي وغاز ميثان أسيوط، فرائحة استديوهات التحليل ألعن من رائحة معمل تحليل في مستوصف في البساتين!، ثم إن أي زملكاوي مثلي ليس له أي عين في الكلام عن الأهلي ومبارياته ومجلسه فلما نفوز مثله ويكون عندنا مجلس إدارة مثله وليس مجلس حرب يبقي نتكلم، فالحقيقة أن تشجيع الزمالك هو أكثر مرض انتشارا في مصر بعد أمراض الفشل الكلوي والسرطان والسكر، ويشاع أن دكتور مصطفي السيد الذي نجح في علاج جينات السرطان في أمريكا قد بدأ التجربة أصلاً لعلاج واحد زملكاوي من زملكاويته وربنا كرمه والزملكاوي مات لكن اكتشف علاج السرطان، وبغض البصر عن هذا كله رغم أن أحدًا لم يعد يغض البصر في شوارع القاهرة حيث ارتفعت نسبة التحرش في الدم خصوصًا وقد أصاب العجز الجنسي معظم المصريين فبدأوا في مد أيديهم لأن شيئًا آخر لم يعد قادرًا علي المد، ورغم ما يردده الأهلاوية أن الأهلي فوق الجميع يستدعي سؤالاً: هوه فوقهم بيعمل إيه؟ ومين الجميع دول إذا كانت مصر كلها أهلاوية كما يقولون، رغم كل هذا وأكثر فأنا أعتقد أنه محض كلام فارغ بيحاولوا يعبوه أي حاجة منذ زمن ولا يعرفون، المهم هو ما جري أثناء بث مباراة الأهلي وأسيوط في القنوات الفضائية، فقد قطعت الدولة البث عن هذه القنوات تماما وظهرت الشاشات سوداء!
هذه مصيبة سوداء مع إن الأهلي بيلبس أحمر
ليه؟
أولاً: هذه هي المرة الأولي التي تلجأ فيها الدولة إلي قرار قطع البث بمنتهي البلطجة والوقاحة والعنف دونما اعتبار لأي رد فعل ولا تقدير للموقف.
ثانيًا: هذا تعبير عن أن التعاقدات والقوانين في مصر عبارة عن ورق تواليت ولا تعني الحكومة في شيء، فهذه القنوات متعاقدة مع الطرفين اتحاد الكرة واتحاد الإذاعة والتليفزيون تعاقدا قانونيا واضحا تمامًا، ومع ذلك فالدولة رمت بالقانون في سلة القمامة.
ثالثًا: هذا دليل علي أن الحكومة عيلة وملهاش كلمة فأن ترسل خطابًا رسميًا الساعة السادسة مساء تقول فيه: «من حقكم أن تعرضوا المباراة» ثم تقول شفويا «اعرضوها عن طريق شاشة التليفزيون الرسمية»، وعندما يكش حسن حمدي في التليفون في أنس الفقي يقوم وزير الإعلام الحاصل علي أعلي شهادة علمية وهي بكالوريس تجارة فرع الخرطوم يتخلي عما تعلمه من أن التاجر يتربط من كلمته ويؤكد أن وزير الإعلام مش مربوط فيقرر قطع البث عن القنوات فهذا أمر يؤكد المعلومة المؤكدة أن أنس الفقي زملكاوي وبيخاف إن حسن حمدي يفعل معه ما يفعله أبو تريكة وهو منفرد بعبدالمنصف.
رابعًا: وهذه هي خلاصة البلوي المنيلة التي جرت أثناء مباراة تافهة، أن الدولة فعلت سابقة أولي في التدخل السافر - وباللام كمان لو حبيت - في حرية القنوات الفضائية وقطعت إرسالها وهو ما يمكن أن تطبقه كلما أرادت وفي أي وقت تشاء ومع أي حدث يغضبها، فإذا تكلم مثلا سعد الدين إبراهيم أو سعد زغلول في فضائية ممكن تقلبها الدولة شاشة سوداء، وإذا ظهرت مظاهرة علي شاشة أو التقي مذيع بمنسق كفاية أو مرشد إخوان أو أمين منظمة حقوق إنسان تستطيع الحكومة طبقا لهذه السابقة أن تقطع البث وهو إرهاب وقرصنة وعمل غير شرعي ورقابة فجة لكن أهي عملتها في ضربة البداية مع مباراة كرة ونفعت وعدت، فالقنوات الفضائية دخلت منذ أحرز أحمد بلال هدفه في بترول أسيوط عصر البرميل!

هناك ٧ تعليقات:

انا حره يقول...

ابراهيم عيييييييسى

انا افتكرت انك انت اللى كاتب كل الكلام الكبير دا بما انك زملكاوى من زمان

انا حره يقول...

بقى انا بحلو يازملكاااااااااااوى

Esmat يقول...

تحيات كبيرة
يا رب تكون بخير ديما
دى بلدنا اللى لا تحترم ناس ولا قوانيين دى العادى
الكل بيناطح فى بعض.
وإحنا الغلابة
ربنايرحمنا بقى

Hannoda يقول...

أنا كمان كنت فاكراك انت اللي كاتب الكلام

بس ده ما يمنعش اني حسيت بغضبك في البوست

و الله حاجة تزعل لما تبقى الرياضة و تشجيع فرقها اللي المفروض انه جانب في الحياه يهون علينا مصاعبها و دواماتها

يكون هو سبب حرق دمنا و ثورتنا

أنا ماليش في الكورة قوي
بتابع الماتشات المهمة و بس
بتابع المنتخب أكتر

لكن بابا فارض عليها أكتر من 3 ساعات يوميا برامج الكورة و حياه الاندية و الانتخابات و خلافات شوبير و مرتضى و حسن صقر و مش عارفة مين

بتألم لما بتفرج عليهم و على اللي بيعملوه فبعض و كمية التلاعبات و الفساد و الهجوم و الخناقات

وناس تلاقيهاشكلها محترم و ليها مكانة فقلوب اللي بيحبوهم و فجأه يصغروا نفسهم بشتيمة ده و تلقيح كلام على د بصورة بتهزقهم هم وهم مش واخدين بالهم

أكتر صورة بتكبسني قدام نفسي كل ما أدافع عن مصر و المصرين هي صورة الاعلام في قنوات الكورة
ايه اللي بيحصل ده أنا مش فاهمة

بس انت مالك غايب كده ليه

اسكندراني في الغربة يقول...

انا حرة
انا كنت عاوز اكتبة بس هيما سبقني
وبس كدة

اسكندراني في الغربة يقول...

Esmat
منوراني بعد غياب كبير بس العذر انة كان في اسكندرية

عندك حق دا حال بلدنا
المدونة بتاعتك مبتفتحش معايا؟
تحياتي

اسكندراني في الغربة يقول...

Hannoda

اكتر حاجة عجبتني في المقال دة انة جامع مشاكل كتيرة بأسلوب ساخر و رابطها بالاهلي
وان كنت اعتقد ان كلامة عن الاهلي فية اسقاط كبير على الحزب الوطني
طبعا وجة التشابة كبير بينهم من اول انة بيكسب كل البطولات بأي طريقة لحد شعار الاهلي فوق الجميع.
.....
انا موجود ومتابع بس مفيش النفس الي تقول.
تحياتي ومنوراني