غراب البين

soon

الريس عمر حرب

الفيلم كما شاهدتة

ادم اخطأ وأكل من الشجرة المحرمة.. ومش راجع الجنة تاني

عقاب ادم كان نزولة الارض.. الي بيحكمها الشيطان

الدنيا صالة قمار .. متتعبش نفسك

لايوجد اي مشهد لرجل دين او شيخ جامع.. او حتى راجل لابس ابيض في ابيض

استغفر الله العظيم) اتقالت مرة واحدة بس طول الفيلم.. لدرجة اننا ضحكنا

الدنيا مفيهاش كرامة.. فا متتحمأش اوي يعني

الدنيا فيها حب و فيها جنس ..خد الاتنين و ريح نفسك

الكازينو زي الكفن تدخل فيه عريان وتخرج منه عريان».. ومن غير قطنة كمان

الشيطان بيغير من الخالق و عاوز يقلدة بأصطفاء ابن او خليفة

اعمل الي انت عاوزة في الاخر انت بتعمل الي الشيطان عاوزة

........................

انا فين

الرياض .. دبي .. الاسكندرية

و بالعكس

مبرووووووووووك

عاوز انام

بقالي 29 ساعة صاحي وطالعة في دماغي اكتب بوست

معا اني اخر هواية عندي هي الكتابة

طول عمري انا و الكتابة مش صحاب

من ايام القلم لحد الكي بورد

نادر لما يكتبوا الي انا عاوزة

وادي مثال حي

بقالي ساعتين بكتب السطرين الي فوق

لدرجة اني نسيت انا كنت عاوز اكتب اية

أه

هو المفروض اكتب بوست بمناسبة مرور سنة على افتتاح المدونة

يعني المفروض اجيب تورتة و شمعة وكيك و اعمل حفلة

وأقيم الفترة دي و اكتب عن المدونين الي اتأثرت بيهم و الي بتابعهم

او عن احسن بوست كتبتة و أو أسوأهم

بس نظرا لأن السطور بدأت تلعب ادامي

ومش شايف الفرق مبين النون و التاء

مش حيبقي غير اني أشكر الاصدقاء الي استحملوا انهم يوصلوا

للسطر دة من غير ميقفلوا الصفحة و يحلفوا انهم ميجوش هنا تاني

واوعدهم لو صمدوا سنة كمان و ربنا ادانا العمر حعملهم حفلة أكبر من كدة

طبعا بعد ازمة العيش انت زهقانين من اكل الكيك والتورتة .

علشان كدة جايبلكوا حاجة مختلفة


http://aboukhar2.blogspot.com


دي مدونة فيها اكتر من 6250 كتاب في كافة المجالات

--

ملحوظة

لم يكن من اولويات هذة المدونة الكتابة عن السياسة

لذلك سأكتفي بهذة الاغنية لمنير

طول عمر العسكر عسكر

بس الناس الناس كانت ناس

hello

انا المصري

مبروووووووووووووووووووووك

مبرووووووووووووووووووووووووووووووووووك

مبرووووووووووووووووووووووووووووووووووووك

طبعا مصر كلها ما نمتش بعد الماتش

واحنا كمان هنا في دبي

فرحتنا كانت اكبر من انها تتوصف

بس بالرغم من كل دة

كانت في امنية واحدة في عين كل واحد منا

يا ريتنا كنا هناك

حـالة كـدة

انا في دبي

بس على عكس ما كنت متوقع

مش مبسوط

لية؟

مش عارف بس هي حالة كدة

بدأت يوم ما روحت احجز تذكرة الطيران

يمكن علشان اول مرة متكونش مصر طرف في الرحلة

يمكن علشان مكنش كل همي و انى احجز على مطار اسكندرية مش القاهرة

من ساعتها و انا عندي الحالة دي

حالة كدة مش عارف اية

-------------

المرادي مش احساس غربة

انا بقالي كتير متغرب يعني مش حتفرق كتير

بالعكس انا رايح دبي يعني رايح فسحة و ترفية اكتر منة شغل

بس من ساعت ما وصلت و كأني بتفرج عليها من وراء لوح زجاج

غير متحمس لأي حاجة . غير مهتم بأي جديد

وادي عدى يومين ولسة عندي الحالة دي

حالة كدة مش عارف اية

كنت هناك

موسم الحج لعام 1428

بعد البيات في منى يوم الثامن من ذي الحجة

نتوجة الي الوقوف في عرفة

بعد 3 ساعات في عرفة وصلنا لجبل الرحمة الي من الصعب جدا الصعود علية









وعند الغروب يتجة حوالي 2.3 مليون حاج للمبيت في المزدلفة وجمع الحصى










و في الصباح التوجة لرمي الجمارات










رمي الجمرات كان من اصعب مناسك الحج ولكن بعد التعديلات و التوسعات اصبح اسهلها على الاطلاق








بعد الرمي يتوجة الحجاج الي الحرم للتحلل من الاحرام











طواف الافاضة






وبعد تكرار رمي الجمرات ثلاث مرات في ايام التشريق الثلاثة



يتبقى طواف الوداع

ليس هذا كل شعائر الحج و لكن ما استطعت تصويرة فقط

داعي الله عزوجل ان يكتبها لكل المسلمين

كان معكم اسكندراني في الحج

رحلة العمر

كل عام وانتم بخير وعـــــيد ســــعيد

اراكم بعد العودة ان شاء الله

العــــــــودة

تانــــي تانـــي تانــــي
راجعين للغربة تانــــي
و الحــر و العـذاب من تانـــــــي

******************

عدي اسبوع على الرجوع من الاجازة

لو متشائم حقول لسة بدري على الاجازة الي جاية

لو متفائل حقول عدي اسبوع بحالة من فترة ما قبل الاجازة

****************

اما الي حصل في اسكندرية و عملت اية؟

فأنا مش فاكر حاجة الاجازة عدت بسرعة البرق

يمكن بعد ماافرغ شريط الذكريات احكيلكم انا كنت فين وعملت اية

ويمكن لأ

********************

المهم ان الايام دي هاديةجدااا مملة جداا

لدجة اني احتجت اسبوع علشان اعرف فين طريق المدونة

ولما وصلت بفعل فاعل احتجت يوم كامل علشان اكتب الكلمتين دول

********************

18/11/2007

باقي سنة بالتمام و الكمال و اوصل ل30 سنة

عقبالكم

********************

اخر صورة لي الاسكندرية من شباك الطيارة

اعـــلان

بمناسبة قرب انتهاء الشهر الفضيل و ايضا قرب حلول عيد الفطر المبارك

وكما هي عادتنا بالافراج عن السجناء التي مر عليهم ثلاث ارباع المدة بهذة المناسبة

قررنا سحب اللقب مؤقتا من السيد/ اسكندراني في الغربة و الاكتفاء بلقب اسكندراني

وشكرا

.

.

.

القـرد : بقا اخيرا ياخد اجازة ويعمل بوست هابــط كدة

ياسمين: عارف لو كان كلمني كنت عملتة بوست مليان حنين وشوق وغربة ولهفة

القـرد : انا لية حاسس اني قريت البوست دة قبل كدة يا ياسمين

ام نبيل رخصت كل كروت الشحن

لأ مش دة

اسكندراني في اسكندرية يا رجالة

وحوي يا وحوي

ربي أنت أعلم بنفسي مني
وأنت أعلم بمكانتهم عندي

فيا عالم ما بنفسي أسعدهم مقدار حبي لهم وأغفرلهم
و اتهم سؤالهم وبارك لهم في شعبان وبلغهم رمضان
فٍاني احبهم لوجهك الكريم يا رب العالمين

الهم اجعل قارئها ممن دعاك فأجبتة
وتوكل عليك فكفيتة
واستهداك فهديتة
وتقبل منا يا رب العالمين

.
.
.
.

لما تكون

في ناس من المغضوب عليهم وعايشين برة اسكندرية مش بيزروها غير في الصيف

مش بيشوفوا غير الزحمة و الحر و الرطوبة

وبما ان الصيف قرب يخلص والشتا بيدق الابواب

عاوز اقولكوا انكم فاتكوا كتييييييير

لما يكون الصيف ...................... بفتكر الشتا

لما تكون مش مستحمل الحر .................... بفتكر شهر طوبة

لما تكون زحمة ................ بفتكر الكورنيش الساعة 2 باليل

لما يكون جو مكتوم ................... بفتكر النوة

لما يكون الشط مليان ناس ........... بفتكر الصيد

لما اكون وحيد ..................... بفتكر التمشية

لما تكون الشمس ................. بفتكر الغيوم

لما تكون وحشاني ...... برسمها

واسرح فيها في عنيها ..... وكلمها

واعدي الحد و المسموح

واغنيةمن فؤاد مجروح

بحبك يا حبيبة الروح

ياتري فاكراني

ولا مش فكراني

النتيجـة

بعد حرب ضروس استشهد فيها عشرات الساعات من التفكير و قضى نحب مئات الساعات من العمل المجهد وتساقطت فيها حبات العرق كالابطال وقيام بعض الافكار بعمليات استشهادية

كانت النتيجـة

اقلـع غمـاك يـا ثـور وارفـض تلــف

اكسـر تـروس السـاقيـة و اشـتمم وتـف

قال: بس خطـوة كمان .. وخطـوة كـمان

يا اوصـل نهـاية السـكة . يا البيـر يجـف

.

.

النتيجة ليست استسلام ولكنها هزيمة استراتيجية

المرادي مش حلم

المرادي مش حلم
المرادي لازم أكون صاحي
المرادي معنديش بحر أرمي همومي فية
المرادي صوت منير مش وصلي
المرادي لازم أعرف أني بعيد

المرادي صحابي ابعد
المرادي عارف يعني اية ان لية أهل
المرادي بس عرفت .. بعد مابعدت
المرادي عرفت أد اية كنت أحمق لما عملت لنفسي شرنقة وأنا وسطهم
المرادي فهمت انهم كانوا الغطاء الي كنت بهرب بية منهم
المرادي فهمت يعني اية كل ما تبعد تشوف أكتر
المرادي فهمت يعني اية كل ما تبعد تشوف أوضح
المرادي عارف الثمن الي دفعتة

المرادي لازم قرار
المرادي دا قراري انا
المرادي مفيش مساعدات خارجية
المرادي مليكش وسائل مساعدة
المرادي محتاج حلول غريبة
المرادي محتاج احسبها صح
المرادي لازم أخرج من المدينة الفاضلة الي عايش فيها لوحدي
المرادي القرار مهم
المرادي محدش حيخدوا غيري
المرادي لازم أحسب خطواتي بعناية
المرادي حطلع رأسي من الرمل

المرادي محطوط مع هاملت في خانة اليك
المرادي صوتي حيكون أعلى منة و أنا بقول أكون أو لا أكون
المرادي لازم مواجهة
المرادي لازم صراع
المرادي لازم حرب
المرادي لازم انتصر
المرادي مش مهم الهزيمة
المرادي المهم المواجهة
.

.

‏المرادي بجد مش عارف أعمل اية

مجرد حلم

ماشي على شط البحر لوحدي و شتا خفيف يخليك تحس أنة نازل بس علاشان يلمس وشك .القمر أبيض و صابغ الدنيا كلها بلون فضي وأنا عامل حسابي لابس كاب وجاكت و بطلون جنز وسماعات في ودني مخليا صوت منير كأنة جاي من الا مكان
مش كل شيئ بيفوت في عمرنا بيجرح ..... قلب الحياة مليان حاجات و بتفرح

الحلم دة هو أسكندرية بالنسبالي يعني لو حد سألني عنها يا أما مش حرد علية يا أما ححكي لحد ميوقفني يا أما أحكيلوا الحلم
عندي واحد صحبي من القاهرة لما حكيتلة عن الحلم دة قالي انتوا يا اسكندرانية كدة محسيسنا ان البحر دة كل حاجة مع ان عندنا النيل زية و بنحبة بردة بس مش بالجنون دة ..أنا سألتة و أنتا بتتمشى علا النيل بتشوف اية الناحية التاني؟
قال بشوف الشط التاني طبعا .... هو دة الفرق احنا معندناش شط تاني . معندناش حدود. الدنيا عندنا مفتوحة مهما كان تفكيرك محدود مش حتشوف الشط التاني . ومهما كنت مبدع صعب عليك تتخيل الشط التاني
المهم نرجع للحلم أنا معرفش أول مرة حلمتة أمتا أو أول مرة أخذت بالي انة بيتكرر علا فترات بس الي أعرفة انة كل مرة كان بيجسد جزء من حياتي

نسيت اقول ان الحلم كل مرة بيبدأ بنفس الشكل بس بعديها بيتغير حسب الحالة
فاكر مرة بدأ الحلم بـــ بحر مطر كاب جاكت ضوء فضي صوت منير

هب الدنيا قلبت شمس حر جو صيف يخنق و صوت منير بيقول
منيش اخر حبيب يدخل مدينتك ................ ولا حتكوني يوم اخر حبيبة
وطبعا دي كانت اخر فرشة الوان في لوحتي انا و هي و بعديها القصة اصبحت ابيض و اسود وساعات اسود بس
مرة تانية بدأ بردوا بـــ بحر مطر كاب جاكت ضوء فضي صوت منير
وهب قلب الجو و الشتا بيذيد و التمشية مستحيلة و عندي حلين يا اركب و اروح بيتنا يا اكمل و اجرب
دا كان اليوم الي اخت فية قراري انا اسافر
اية يا بلاد يا غريبة ................. عدوة ولا حبيبة

لية افتكرت الحلم دة الان و لية بكتب عنة علاشان هو الي افتكرني بعد 3 سنين من اخر مرة و بالرغم من جو الصحراء الي عايش فية ينسيك لون البحر الا انة قدر يجي و يبد أ بردوا بــ بحر مطر كاب جاكت ضوء فضي صوت منير
بس المرادي مكنتش بتمشى كنت قاعد بتفرج على البحر. و المطر طعمة مالح معرفتش اذا كان دة طعم رزاز البحر نفسة ولا طعم دمعتين نزلوا ميني غصب عني قبل منام من شوقي لأهلي و للبحر لما عرفت اني مش نازل اجازة الصيف دة

أمانة يا هواء أكتب على الشراع .................. اللوقا قريب من بعد الوداع

الغريب في الحلم دة انة مفيهوش بنات ( مزز يعني) حتى هي بكل سلطنها علي قلبي مقدرتش توصل انها تكون جزء من الحلم دة يعني ممكن تعتبروة بطولة مطلقة لشخص واحد
أو ان الحلم نفسة عارف ان الناس و الشخصيات و الأسماء حتتغير علشان كدة عمل سور كبير على نفسة ميدخلهوش غيري انا . بحر . مطر . كاب . جاكت . ضوء فضي . صوت منير

.
.
.

Coming Soon

.
.
.
Under Construction
.
.
.